ბლინის სახლი ჯემით და არაჟნით

 

მასალა:

2 ც. კვერცხი

200 გრ. შაქარი 

350 მლ. რძე

200გრ. ფქვილი

მცენარეული ზეთი, შესაწვავად 

200 გრ. მარწყვის ან ალუბლის ჯემი (თხელი არ უნდა იყოს)

200 გრ. გასუფთავებული, კანგაცლილი ნიგოზი

300გრ. სქელი არაჟანი, მინიმუმ 25%იანი ცხიმიანობის

მწიკვი მარილი

 

მომზადება:

1. 2 კვერცხი, მარილი და 1 სუფრის კოვზი შაქარი ავთქვიფოთ. ჩავასხათ 100მლ. რძე, დავამატოთ ფქვილი და ავურიოთ. თანდათან დავამატოთ დარჩენილი რძე. მიღებული მასით გამოვაცხოთ თხელი ბლინები.

2. ნიგოზი წვრილად დავჭრათ, ან დავაქუცმაცოთ ჩოფერში და შევურიოთ ჯემს. მიღებული მასა დავდოთ ბლინზე და რულეტივით გადავახვიოთ. რულეტები დავალაგოთ ისე, რომ სახლის სახურავს დაემსგავსოს: ქვემოთ უფრო მეტი რულეტი დავაწყოთ, მეორე, მესამე და შემდეგ რიგებში კი ნაკლები, ისე რომ ბოლოს მხოლოდ ერთი რულეტი დავადოთ. რიგებს შორის გადავუსვათ არაჟნის კრემი, რომელსაც შედეგნაირად მოვაზადებთ:

3. სქელი არაჟანი გავთქვიფოთ დარჩენილ შაქართან ერთად. წავუსვათ რიგებს შორის და ბოლოს ზემოდანაც მოვასხათ. ბლინის "სახლი" მოვათავსოთ მაცივარში მინიმუმ 1 საათით. უკვე კარგად გაციებულს, სურვილისამებრ, შეგვიძლია მოვასხათ შოკოლადი და გავაფორმოთ პიტნის ფოთლებით.

გერიელად მიირთვით!


 

ქათმის რულეტი


მასალა:

240 გრ. მდნარი ყველი
3/4 ჩ.კ. ნივრის ფხვნილი ან ნედლი ნივრის 2 კბილი (დაქუცმაცებული)
1/3 ჩ.ჭ. ცხარე მწვანე წიწაკა, დაჭრილი
1/2 ჩ.ჭ. დაკონსერვებული სიმინდი
3/4 ჩ.კ. წიწაკა ჩილის ფხვნილი
4 ცალი ქათმის ფილე
2 ჩ.კ. კარაქი, დარბილებული
1/2 ჩ.ჭ. კეფირი
3 ს.კ. თაფლი
1 ჩ.ჭ. გახეხილი ყველი, საშუალო სიმლაშის
1,5 ჩ.ჭ. პომიდვრის სალსა 
2/3 ჩ.ჭ. არაჟანი
საფანელი ამოსავლებად. 
ძალიან უხდება ნებისმიერი სახეობის დანაყილი ჩიფსები საფანლის ნაცვლად.

მომზადება:

1. გააცხელეთ ღუმელი 180 გრადუსზე. საშუალო ზომის ჯამში ერთად აურიეთ მდნარი ყველი, ნივრის ფხვნილი, წიწაკის ნაჭრები და სიმინდი.
2. ჩიფსები დანაყეთ ცალკე ჯამში, ან გამოიყენეთ საფანელი. შეიძლება ჩიფსების და საფანლის ერთად არევაც.
3. ქათმის ნაჭრები დაბეგვეთ ვიდრე ხორცი არ გახდება 0.5 სმ. სისქის (ხორცი პრიალა მხარით ქვემოთ უნდა იდოს). ხორცს გადაუსვით დარბილებული კარაქი დაბეგვილი მხრიდან.
4. მოათავსეთ წინასწარ მომზადებული მდნარი ყველის ნაზავი დაბეგვილ ხორცზე ცალ მხარეს და გადაახვიეთ ხორცი რულეტივით. რულეტები ამოავლეთ ჯერ კეფირში და შემდეგ საფანელში. თუ იხსნება შეგიძლიათ გამოიყენოთ კბილის ჩხირები დასამაგრებლად. მოათავსეთ რულეტები ცეცხლგამძლე შუშის ჭურჭელში და მოაპკურეთ თაფლი.
5. აცხვეთ დაახლობით 35-45 წუთი, ვიდრე ქათმის ხორცი გულში არ დაკარგავს ვარდისფერ ფერს. მზა რულეტებს მოაყარეთ გახეხილი ყველი და ისევ შეაბრუნეთ ღუმელში 4-5 წუთით, ვიდრე ყველი დადნება.
სუფრასთან მიიტანეთ დაჭრილი, პომიდვრის სალსასთან და არაჟანთან ერთად.

სურვილისამებრ რულეტს გულსართში შეგიძლიათ დაამატოთ ლორის ნაჭრები. მოუხდება შავი ქლიავის ჩირიც.

ცხელი შოკოლადი პიტნის ექსტრაქტით


მასალა:
1,5 ჭიქა მაღალპროცენტიანი ნაღები (36-40%)
1,5 ჭიქა რძე
1/4 ჭიქა შაქარი
180 გრამი შავი შოკოლადი
1/2 სუფრის კოვზი  პიტნის ექსტრაქტი
კრემისათვის:
1 ჭიქა მაღალპროცენტიანი ნაღები
2 სუფრის კოვზი შაქრის პუდრი
1/4 ჩაის კოვზი პიტნის ექსტრაქტი

მომზადება:
1. საშუალო ზომის ჭურჭელში შეურიეთ ერთმანეთს ნაღები, რძე და შაქარი.
2. დადგით ცეცხლზე და ურიეთ ვიდრე არ დადნება შაქარი.
3. როდესაც ნარევი დაიწყებს ორთქლის გამოყოფას, დაამატეთ შოკოლადი. ოდნავ ათქვიფეთ რომ შოკოლადი დადნეს.
4. დაამატეთ პიტნის ექსტრაქტი.
5. იმ შემთხვევაში, თუ გვინდა რომ ზემოდან მოვრთოთ კრემით, მაშინ, ათქვიფეთ ნაღები, შაქრის პუდრი და პიტნის ექსტრაქტი ერთად, ვიდრე არ გაჩნდება პატარა ბუშტები. კრემი კოვზით დაადეთ ცხელ შოკოლადს და მიირთვით.
6. გასაფორმებლად შეგიძიათ გამოიყენოთ შოკოლადის ნათალი, ნორჩი პიტნის ფოთლები ან კანფეტის ჩხირები.

ჩრდილოეთის ირმები


მასალა:

10 ცალი დიდი ზომის  მარშმელოუ (ზეფირი)
2 ფილა შავი შოკოლადი, წყლის აბაზანაზე, ორთქლზე ან მიკროტალღურ ღუმელში დამდნარი
20 ცალი კრეკერი, სასურველია იყოს დაგრეხილი ნასკვის ფორმის, რქებისათვის
2-3 ნატეხი თეთრი შოკოლადი, წყლის აბაზანაზე ან ორთქლზე დამდნარი
10 ცალი წითელი ფერის M&M ან სხვა რომელიმე მრგვალი ფორმის კანფეტი ცხვირისათვის
10 ცალი ჩხირი, პლასტმასის, ან ხის, რომელზეც უნდა ჩამოვაცვათ ირმის თავები
კბილის ჩხირები

მომზადება:

1. ჩაარჭეთ თითოეულ მარშმელოუში ჩხირი
2.  დამდნარ, მაგრამ ოდნავ გაგრილებულ შავ შოკოლადში სათითაოდ ამოავლეთ მარშმელოუ, ისე რომ სულ დაიფაროს შოკოლადით, დააცადეთ, რომ ჩამოიწუროს ზედმეტი შოკოლადი
3. დადეთ 2 ცალი კრეკერი პერგამენტ ან ფოლგადაფარებულ თუნუქის ფურცელზე გვერდიგვერდ, როგორც რქები. ზედ დაადეთ შოკოლადში ამოვლებული მარშმელოუ ჩხირით. ცხვირის ადგილას დადეთ M&M-სის კანფეტი, თეთრი შოკოლადის წვეთებით გაუკეთეთ თვალის წრეები და შავ შოკოლადში ჩარჭობილი კბილის ჩხირით გამოყავით თვალის გუგა,შოკოლადის  წერტილის სახით.
ასე გააკეთეთ ათივე ირემი, დატოვეთ 20-30 წუთით რომ შოკოლადი გამაგრდეს. შემდეგ კი მიირთვით გემრიელად!

ასეთი ირმების გაკეთება ძალიან სახალისოა პატარებისათვის, რა თქა უნდა დიდების მეთვალყურეობის ქვეშ.


საშობაო სახლი



მასალა:

100 გრ. თაფლი
50 გრ. შაქარი
60 გრ. კარაქი
1 ჩაის კოვზი ვანილის შაქარი
თითო მწიკვი დაფქვილი დარიჩინი,მიხაკი და ილი ანუ კარდამონი
1ც. კვერცხი
250-280 გრ. ფქვილი
1 ჩაის კოვზი გამაფხვიერებელი

შაქრის მინანქრისთვის:

3 ც. კვერცხის ცილა
3 ჩაის ჭიქა შაქრის პუდრი
1 სუფრის კოვზი ლიმნის წვენი

მოსართავად:

სხვადასხვა ფერის საკონდიტრო მძივები, ბურთები, ვერცხლისფერი მტვერი, შეგიძლიათ გამოიყენოთ ასევე M&M-ის ტიპის კანფეტები, ასევე მარმელადი. ყველაფერი დამოკიდებულია თქვენი და თქვენი შვილების სურვილებსა და  ფანტაზიაზე.

მომზადება:

1. პატარა ქვაბში ჩაასხით თაფლი, დაამატეთ შაქარი, ვანილი და კარაქი. შემოდგით დაბალ ცეცხლზე და პერიოდულად ურიეთ, ვიდრე მასა არ გახდება ერთგვაროვანი. გადმოდგით და გააციეთ. ამ მასაში დაამატეთ მიხაკ-დარიჩინი და ილი, კვერცხი, ვანილი და კარგად აურიეთ. ცალკე ჯამში ფქვილს შეურიეთ გამაფხვიერებელი და შემდეგ თანდათანობით ჩაყარეთ თაფლიან მასაში. მოზილეთ ცომი, დაამრგვალეთ ბურთივით და მოათავსეთ მაცივარში 2 საათით.
2. ამასობაში მუყაოსგან გამოჭერით თარგი (სურათი იხილეთ ქვემოთ). სახურავი 2 დეტალი, გვერდითა კედლები 2 დეტალი, ფასადი და უკანა კედელი 2 დეტალი. სურვილის შემთხვევაში შეგიძლიათ უფრო მრავალფეროვანი გახადოთ საშობაო სახლი, ამისათვის გნებავთ დაამატეთ საკვამური, ან მეორე სართული. არ დაგავიწყდეთ სახლის კედლებში თქვენთვის სასურველი მოხაზულობის მქონე ფანჯრის და კარის ღიობების ამოჭრა. დამატებით შეგიძლიათ გააკეთოთ ნაძვები ან სხვა ფიგურები (მაგ: თოვლის ბაბუა, ღობე სახლის გარშემო და ა.შ.). რაც უფრო კრეატიული იქნებით, მით უფრო საინტერესო და სახალისო გამოვა თქვენი სახლი და უფრო გემრიელადაც მიირთმევთ მას :)
3. თარგის გამზადების შემდეგ უკვე შეგიძლიათ დაუბრუნდეთ ცომს. გააბრტყელეთ 0,7მმ. სისქეზე. გამოჭრილი თარგის დეტალები დაალაგეთ ცომზე ზემოდან და პატარა დანით დაიწყეთ ცომის გამოჭრა. ამ ეტაპზე უნდა ამოიჭრას ფანჯრის და კარის ღიობები.
4. თუნუქის ფურცელზე დააფინეთ პერგამენტი, ზედ დაალაგეთ გამოჭრილი დეტალები, ოდნავ მოაყარეთ ფქვილი და გამოაცხეთ 180 გრადუსზე 10-12 წუთი.  უფრო მეტ ხანს თუ დატოვებთ შეიძლება დაიწვას ცომი. გამომცხვარ დეტალებს აცადეთ გაგრილება.
5. მოამზადეთ შაქრის მინანქარი, რომლითაც შეაერთებთ დეტალებს და ასევე გააფორმებთ სახლის კედლებს და სახურავს დეკორატიულად. გაგრილებული კვერცხის ცილა ათქვიფეთ ბეზესავით, დაამატეთ შაქრის პუდრი და ლიმნის წვენი. თქვიფეთ, ვიდრე არ მიიღებთ სქელი კონსისტენციის მასას. თუ საჭიროა დაამატეთ შაქრის პუდრი.
გახსოვდეთ რომ რაც უფრო სქელია მინანქარი მით უფრო გაგიადვილდებათ დეტალების შეერთება.  გამზადებული მინანქარი გადაიტანეთ ერთჯერად, ცელოფნის საკონდიტრო ტომარაში და მაკრატლით ოდნავ წააჭერით ტომარას თავი (წვეტიანი მხარე). ჯერ მორთეთ სახლის დეტალები, გაუკეთეთ კონტურები ფანჯრებს, კარს. სახურავზე შეგიძლიათ „დახატოთ“ კრამიტი. დააცადეთ გაშრობა და შემდეგ დაიწყეთ სახლის აწყობა. ამ ეტაპზე საკონდიტრო ტომარას ცოტა მეტად წააჭერით თავი რომ მინანქარი უფრო ადვილად გამოვიდეს. არ იჩქაროთ, დეტალები სათითაოდ შეაერთეთ, მაგ: ჯერ წინა და გვერდითი კედელი შეაწებეთ, დაელოდეთ ვიდრე მინანქარი გამაგრდება და მხოლოდ ამის შემდეგ გააგრძელეთ დანარჩენი დეტალების მიმაგრება. კედლები რომ არ გადავარდეს შეწებებს პროცესში, შეგიძლიათ გამოიყენოთ საყრდენად სხვადასხვა საგნები, მაგ: ჭიქა.  როდესაც სახლის კედლები მყარად მიეწებება ერთმანეთს და მინანქარიც გაშრება (ამისათვის ჯობს მთელი ღამით დატოვოთ ასე სახლი და სახურავი მეორე დღეს დაადგათ) დაიწყეთ სახურავის დადგმა და კარის დამაგრება. განსაკუთრებით მოთმინება გმართებთ სახურავის დამაგრებისას. არ დაიზაროთ და ცოტა ხანი ხელით გეჭიროთ სახურავის დეტალები, რომ არ დაცურდეს კედლებიდან. (ისევ და ისევ შეგიძლიათ ქვეშ დაუდოთ შესაბამისი სიმაღლის ჭიქა და ხელიც აღარ დაგეღლებათ). შესაძლებელია ე.წ. კბილის ჩხირების გამოყენებაც, რომ დეტალები უფრო ადვილად დააფიქსიროთ ერთად.  მინანქარი არცთუ ისე მალე მაგრდება და შრება ამიტომ ცოტა დიდ დროს მოითხოვს სახლის აწყობა, მაგრამ მერწმუნეთ შედეგით ძალიან კმაყოფილი დარჩებით.
6. მას შემდეგ რაც სახლი უკვე მთლიანად აწყობილია და მინანქარი კარგად გამშრალი, შეგიძლიათ გააფორმოთ გარედან სხვადასხვა კანფეტებით.

P.S.  შაქრის მინანქარი რომ არ გამოშრეს და გახმეს მეორე დღემდე, საკონდიტრო ტომარაში დატოვეთ. თუ მაინც გაშრა და გართულდა მისი გამოყენება, მაშინ ხელახლა გააკეთეთ.

შეიძლება იფიქროთ რომ საშობაო სახლის გაკეთება რთულია, მაგრამ მერწმუნეთ ეს პროცესი ძალიან სასიამოვნოა, აუცილებლად გამოგივათ და ყოველ წელს უფრო და უფრო ლამაზ სახლებს გააკეთებთ. ბედნიერ შობა-ახალ წელს გისურვებთ!







შაქრის მინანქარი


მასალა:

1 ჩაის ჭიქა შაქრის პუდრი
4 ჩაის კოვზი რძე

მომზადება:

შაქრის პუდრი და რძე კარგად ავთქვიფოთ ჩანგლით. იმის მიხედვით როგორ სისქის გვინდა მინანქარი, შეგვიძლია დავამატოთ შაქრის პუდრი ან რძე.  თუ გვინდა ფერადი მინანქარი მაშინ შევურიოთ სასურველი ფერის საკონდიტრო საღებავი.

საშობაო ორცხობილა


მასალა:

3,5 ჩაის ჭიქა ფქვილი
1 ჩაის კოვზი გამაფხვიერებელი
1/2 ჩაის კოვზი მარილი
1 ჩაის ჭიქა მარგარინი, დარბილებული
1,5 ჩაის ჭიქა შაქარი
2 კვერცხი
2 ჩაის კოვზი ვანილის ექსტრაქტი

მომზადება:

1,  გაცერით ერთად ფქვილი, გამაფხვიერებელი და მარილი. დიდი ჯამში ათქვიფეთ მარგარინი და შაქარი, ვიდრე არ მიიღებთ ფაფუკ მასას. დაამატეთ კვერცხი, სათითაოდ და ვანილის ექსტრაქტი. აურიეთ ყველაფერი კარგად და თანდათანობით დაამატეთ ფქვილიანი მასა. მოზილეთ ცომი, გადააკარით კულინარიული ცელოფანი და დადეთ გრილ ადგილას 2 საათით.
2.  გააცხელეთ ღუმელი 200 გრადუსამდე. თუნუქის ფურცელს გადაუსვით ცხიმი. სუფთა, ფქვილმყრილ ზედაპირზე გააბრტყელეთ ცომი დადაჭერით სასურველ ფორმებად.
3. აცხვეთ 6-8 წუთის განმავლობაში ან ვიდრე კუთხეები არ გაუყავისფრდება. გამომცხვარი ორცხობილები გამოიღეთ და გააგრილეთ.

ორცხობილები შეგიძლიათ გააფორმოთ სხვადასხვა ფერის შაქრის მინანქრით და საკონდიტრო მძივებით.

საშობაო პუდინგი


მასალა: 

300 გრამი მოცხარი (წითელი, შავი)
300 გრამი ქიშმიში
100 გრამი კარამელ მოსხმული ალუბალი, დაჭრილი
100 გრამი გარგარის ჩირი, დაჭრილი
50 გრამი სხვადასხვა ციტრუსის კანი, დაქუცმაცებული
3 სუფრის კოვზი ბრენდი
200 გრამი უმაღლესი ხარისხის ფქვილი
მწიკვი დაფქვილი მუსკატის კაკალი
200 გრამი დარბილებული კარაქი
200 გრამი ყავისფერი შაქარი
4 ცალი კვერცხი
50 გრამი ნუში
ნახევარი ჭიქა გარგარის ჯემი
1 სუფრის კოვზი ბადაგი

 მომზადება:

ჩაყარეთ ყველა ხილი და ციტრუსის კანი დიდი ჯამში, დაასხით ბრენდი, დააფარეთ თავზე და შეინახეთ ერთი ღამით გრილ ადგილას.
მოამზადეთ წინასწარ 2 ღრმა ფორმა (ჯამის ფორმის), შეგიძიათ შიგ ჩააფინოთ ფოლგა. გაახურეთ ღუმელი 140 გრადუსამდე. (ასევე შეგიძლიათ გამოაცხოთ ერთ ფენად, ამ შემთხვევაში დაგჭირდებათ მხოლოდ ერთი ფორმა).
მეორე დიდ ჯამში მოათავსეთ. ფქვილი, მუსკატი, კარაქი, კვერცხები, ნუში, ბადაგი, შაქარი. კარგად აურიეთ და შემდეგ გადაიტანეთ ხილიან მასაში. მიღებული მასა გაყავით 2 ნაწილად, თითო ნაწილი მოათავსეთ ცალკე ფორმაში, ზედაპირი მოასწორეთ კოვზით, თავზე გადააკარით ფოლგა და გამოაცხვეთ 3 ან 3 საათნახევრის მანძილზე. პუდინგის მზაობა შეამოწმეთ ცენტრში ხის ჩხირის ჩარჭობით, ამოღებისას არ უნდა ამოყვეს ცომი.  მზა პუდინგი გააციეთ და შემდეგ ნახევრები შეაერთეთ თქვენთვის სასურველი კრემის ან გარგარის ჟემის მეშვეობით. მოსართავად შეგიძლიათ თავზე მოასხათ  შაქრის გლაზური და დაალაგოთ რომელიმე ხილი (მოცხარი, ალუბალი).




ბანანის პური შოკოლადის ნატეხებით


მასალა:

1 ჭიქა შაქარი
1 ჭიქა ყავისფერი შაქარი (სასურველია)
1 შეკვრა კარაქი (დარბილებული)
2 დიდი კვერცხი (ათქვეფილი)
3 მწიფე ბანანი (დაჭყლეტილი)
2 ჭიქა პურის ფქვილი
1/2 ჩაის კოვზი გამაფხვიერებელი
1 ჩაის კოვზი სოდა
3/4 ჩაის კოვზი მარილი
1/2 ჩაის ჭიქა ვანილის იოგურტი
1 ჩაის კოვზი ვანილის ექსტრაქტი (ან 1 სუფრის კოვზი ვანილი)
1 ჭიქა შოკოლადის ნატეხი (დაქუცმაცებული ან შოკოლადის წვეთები)
1 ჭიქა წვრილად დაჭრილი ან დამტვრეული თხილეული (ნებისმიერი, თქვენი სურვილის მიხედვით)

მომზადება:

1. გააცხელეთ ღუმელი 180 გრადუსზე. 2 ცალ საცხობ ფორმას გადაუსვით ცხიმი (გამოდგება კექსის მართკუთხა ფორმები). თუ გსურთ შეგიძლიათ გამოიყენოთ პერგამენტის ქაღალდიც. საუკეთესოა სილიკონის ფორმები (გამომცხვარ პურს ძალიან ადვილად ამოიღებთ).
2.  ცალკე ჯამში ჩაყარეთ მშრალი ინგრედიენტები: ფქვილი, შაქარი, გამაფხვიერებელი, სოდა და მარილი (აქვე დაამატეთ ვანილი, ვანილის ექსტრაქტის არქონის შემთხვევაში) და კარგად აურიეთ ერთმანეთში.
3.  მეორე ჯამში მოათავსეთ დაჭყლეტილი ბანანები, ყავისფერი შაქარი, კვერცხი, იოგურტი, კარაქი და ვანილის ექსტრაქტი და ასევე კარგად აურიეთ.
4.  ეს ყველაფერი გადაიტანეთ მშრალი ინგრედიენტების ჯამში და კარგად ურიეთ ხის კოვზით, ვიდრე არ მიიღებთ ერთგვაროვან მასას.
5. დაამატეთ შოკოლადის ნატეხები, თხილეული და ისევ აურიეთ კარგად.
6. გადაიტანეთ მიღებული ცომი ცხიმწასმულ ფორმებში. აცხვეთ დაახლოებით 50 წუთი, ან ვიდრე ზედაპირი არ გახდება სასიამოვნო მოყავისფრო ფერის. მზაობა ასევე შეგვიძლია შევამოწმოთ პურის შუაგულში ხის ჩხირის ჩარჭობით. თუ ჩხირი დაუბრკოლებლად ამოიღეთ და მას თან არ ამოჰყვა ცომი, ესე იგი პური უკვე გამომცხვარია. გამოიღეთ და გააციეთ 1 საათის მანძილზე მაინც, ვიდრე დაჭრით.

სოუსი პესტო


მასალა: 4 ჭიქა ბაზილიკის (შაშკვლავის) ფოთლები, 3 კბილი ნიორი, 1/4 ჭიქა ზეითუნის ზეთი (უსუნო), 1/4 ჭიქა მოხალული ნიგოზი, 1/4 ჭიქა გახეხილი ყველი პარმეზანი (შეიძლება ჩავანაცვლოთ სულგუნით).
მომზადება: ყველა ინგრედიენტი მოვათავსოთ ბლენდერში და ავთქვიფოთ ვიდრე არ მივიღებთ ერთიან მასას.
რჩევა: უკეთესია თუ გამოვიყენებთ როდინს, ასე ბაზილიკი უფრო შეინარჩუნებს თავის არომატს. სურვილისამებრ შეგვიძლია დავამატოთ 1ს.კ. ლიმნის წვენი.

ფარშირებული ჩილი

მასალა: 10 ცალი წიწაკა ჩილი, 500 გრ. მაგარი ყველი, 4 ცალი კვერცხი, 100გრ. ფქვილი (ამოსავლებად), 1 ჭიქა საფანელი, მცენარეული ზეთი შესაწვავად, მწიკვი მარილი.
მომზადება: წიწაკები გარეცხეთ, გააშრეთ და შეწვით ღუმელში ან გრილზე. გააგრილეთ და გააცალეთ კანი. ცალ მხარეს  ჩაჭერით სიგრძეზე დანით. ყველი დაყავით 10 ტოლ ნაჭრად. შემდეგ თითოეულ წიწაკაში ჩადეთ ყველის ნაჭერი და ამოავლეთ ფქვილში. კვერცხის ცილები ავთქვიფოთ გათეთრებამდე მარილთან ერთად. ცალკე ავთქვიფოთ კვერცხის გულები  და ამის შემდეგ შევურიოთ ცილას. ფქვილმოყრილი წიწაკები ამოვავლოთ კვერცხის მასაში და შემდეგ საფანელში. ტაფაში გავაცხელოთ ბლომად ზეთი და შიგ შევწვათ წიწაკები. 

რჩევა: წიწაკებისათვის გარნირად შეგვიძლია გამოვიყენოთ მოხარშული ბრინჯი. ფქვილში შეგვიძლია ავურიოთ თქვენთვის სასურველი ნებისმიერი სანელებელი და ისე ამოვავლოთ შიგ წიწაკები. საფანელის ნაცვლად შეგვიძლია გამოვიყენოთ სეზამის მარცვლები ან ქოქოსის ფანტელი.

შოკოლადის ფონდიუ

მასალა: 2 ფილა შავი, მწარე შოკოლადი, 1/2 ჩაის ჭიქა რძე, 3ც. კვერცხის ცილა, 1 ჩაის ჭიქა შაქარი, 2ც. ბანანი, 2ც. კივი, ვანილი გემოვნებით.
მომზადება: მომინანქრებულ ქვაბში აადუღეთ რძე, დაუმატეთ ვანილი. ცხელ რძეში ჩატეხეთ შოკოლადი, ურიეთ ხის კოვზით, სანამ ერთგვაროვან მასას არ მიიღებთ. ბანანი და კივი მრგვლად დაჭერით და დაალაგეთ სასურველი ფორმისა და ზომის ჭურჭელზე. კვერცხის ცილითა და შაქრით გააკეთეთ ბეზე. შემდეგ ბეზე მოათავსეთ ბანანსა და კივზე,  ზემოდან მოასხით ცხელი შოკოლადის მასა, გაგრილეთ და შემდეგ შედგით მაცივარში, რომ კარგად გაცივდეს. გემრიელად მიირთვით.

ქათამი ქოქოსის ფანტელში

მასალა: 700-800 გრ. ქათმის რბილი ხორცი (ფილე), 2ც. კვერცხი, 1 ჩაის ჭიქა ქოქოსის ფანტელი, 0,5 ჩაის ჭიქა ფქვილი, 3-4 კბილი დაჭყლეტილი ნიორი, ზეითუნის ზეთი მოსაპკურებლად, მარილი, პილპილი გემოვნებით. სოუსისათვის: 2 სუფრის კოვზი მდოგვი, 0,5 ჩაის ჭიქა ატმის ჯემი. 
მომზადება: ჯამში ჩავყაროთ ქოქოსის ფანტელი, ფქვილი, მარილი, პილპილი, ავურიოთ კარგად. ცალკე ჯამში ავთქვიფოთ კვერცხი  ჩანგლით და დავამატოთ ნიორი. ქათმის ნაჭრები ამოვავლოთ ჯერ კვერცხში, შემდეგ ქოქოსისა და ფქვილის ნაზავში და მოვათავსოთ პერგამენტიან  თუნუქის ფურცელზე, ზემოდან მოვაპკუროთ ზეითუნის ზეთი. შევდგათ წინასწარ 200 გრადუსამდე გახურებულ ღუმელში, 30-40 წუთით, ვიდრე არ შეიწვება. დროდადრო შეგვიძლია გადავატრიალოთ.  მოვამზადოთ სოუსი: ერთმანეთში ავურიოთ ატმის ჯემი და მდოგვი, კარგად ავთქვიფოთ ვიდრე ერთიან მასად არ გადაიქცევა და შევდგათ მაცივარში. როდესაც ქათმის ნაჭრები შეიწვება კარგად, მომზადებული სოუსი მოვასხათ თავზე და ცხელივე მივიტანოთ მაგიდასთან. (სოუსი ასევე შეგვიძლია ცალკე ჭურჭელში მოვათავსოთ). 

რჩევა: სურვილისამებრ, შეგვიძლია მოვამზადოთ ნებისმიერი სხვა სოუსი, რომელიც უხდება ხორცეულს, ან უბრალოდ მივირთვათ ტყემლის საწებელთან ერთად.
ფქვილისა და ქოქოსის ნაზავს შეგვიძლია დავამატოთ მშრალი აჯიკა, ან ნებისმიერი  სუნელი. ღუმელის ნაცვლად ქათმის ნაჭრები შეიძლება მოვამზადოთ ზეთმოსხმულ ტაფაზეც.

ქათმის კოქტეილი თხილით




მასალა: 300გრ. ქათმის ფილე, 1/2 ჭიქა ნიგოზი, არაქისი ან თხილი, 2ც. ვაშლი, 100გრ. ნიახურის ძირი,  1ც. ლიმნის წვენი, მარილი. სოუსისათვის: 100მლ. ნატურალური იოგურტი, 100მლ. მაიონეზი, 1 სუფრის კოვზი მდოგვი, ნახევარი ლიმნის წვენი, მარილი, შავი პილპილი გემოვნებით.
მომზადება: სოუსი: იოგურტი და მაიონეზი ავურიოთ ერთად, დავამატოთ მდოგვი და ლიმნის წვენი, მოვაყაროთ მარილი, პილპილი და ავთქვიფოთ ჩანგლით. ქათმის ფილე გავრეცხოთ, გავაშროთ, წავუსვათ მარილი და შევწვათ გრილზე ან მოვხარშოთ მარილიან წყალში.  ვაშლებს ამოვაცალოთ გული, დავჭრათ თხელ ნაჭრებად და მოვასხათ ლიმნის წვენი. ნიგოზი ან არაქისი მოვხალოთ ტაფაზე, გავაცალოთ კანი, დავამტვრიოთ და მოვაპკუროთ ლიმნის წვენი. ნიახურის ძირები დავჭრათ პატარა ნაჭრებად, 2-3 წუთით ჩავყაროთ მდუღარე წყალში, ამოვიღოთ გავაშროთ და მოვასხათ ლიმნის წვენი. მომზადებული პროდუქტები ფენაფენა ჩავალაგოთ სანაყინეში ან ფუჟერებში, ზემოდან მოვასხათ სოუსი და ისე მივიტანოთ მაგიდასთან. 
რჩევა: გასაფორმებლად შეგვიძლია გამოვიყენოთ სალათის ფოთლები და ბროწეულის მარცვლები.

ბადრიჯანი საქონლის ხორცით

მასალა: 200გრ. მოხარშული საქონლის ხორცი (თხელ ნაჭრებად დაჭრილი), 600გრ. ბადრიჯანი, 200გრ. ბულგარული წიწაკა, 2ც. პომიდორი, მაიონეზი,  მცენარეული ზეთი, წითელი დაფქვილი წიწაკა,  ნიახური 3-4 ღერი, მარილი გემოვნებით.
მომზადება: ბადრიჯანი დავჭრათ რგოლებად, მოვაყაროთ მარილი და დავტოვოთ ასე 20 წუთით, შემდეგ გადავავლოთ წყალი, ოდნავ გავწუროთ და შევწვათ ორივე მხრიდან. მოვაყაროთ მარილი და წითელი წიწაკა. დავჭრათ პომიდორი, ბულგარული წიწაკა (ჩხირებივით), ნიახური. ყველაფერი ერთად ავურიოთ, მოვაყაროთ მარილი, წიწაკა და მოვაპკუროთ მცენარეული ზეთი. გადავიტანოთ მომზადებული სალათა თეფშზე, შემოვაწყოთ შემწვარი ბადრიჯანი და ხორცის ნაჭრები. მოვასხათ მაიონეზი.

 რჩევა: საქონლის ხორცი, სურვილისამებრ შეგვიძლია კი არ მოვხარშოთ, არამედ შევწვათ. მაიონეზთან ერთად კი შეგვიძლია გამოვიყენოთ ყველიც - დავახეხოთ ზემოდან. საქონლის ხორცი შეიძლება ჩავანაცვლოთ შემწვარი ქათმის ფილეთი.

კარტოფილის ძეხვები ხაჭოთი

მასალა:  800 გრ. კარტოფილი, 200გრ. ხაჭო, 2ც. კვერცხი, 0,5 ჩ.ჭ. მანანის ბურღული ან პურის ფქვილი, 30გრ. ოთახის ტემპერატურაზე დარბილებული კარაქი, მარილი გემოვნებით, ფქვილი ძეხვების ამოსავლებად, მცენარეული ზეთი. გასაფორმებლად: კამა, მაიონეზი, კეტჩუპი. მომზადება:  კარტოფილი გავრეცხოთ კარგად და მოვხარშოთ კანიანად 20-25 წუთი. ხაჭო დავსრისოთ საცერზე. კვერცხი ავთქვიფოთ მარილთან ერთად და ჩავასხათ ხაჭოს მასაში. აქვე დავამატოთ კარაქი და მანანის ბურღული. კარგად ავურიოთ. მოხარშული კარტოფილი გავაგრილოთ, გავფცქვნათ და გავატაროთ ხორცსაკეპ მანქანაში. კარტოფილისა და ხაჭოს მასა გავაერთიანოთ და კარგად ავურიოთ. მიღებული ცომით გავაკეთოთ პატარა ძეხვები, ამოვავლოთ ფქვილში და შევწვათ კარგად გახურებულ ზეთიან ტაფაში. ცხელი, მზა ძეხვები დავალაგოთ თეფშზე, გავაფორმოთ კამით, მაიონეზითა და კეტჩუპით. კერძი სუფრასთან შეგვიძლია მივიტანოთ არაჟანთან ერთადაც. 

რჩევა: თუ გვინდა რომ ძეხვები ხრაშუნა გამოვიდეს, მაშინ ჯერ ამოვავლოთ გათქვეფილ კვერცხში, შემდეგ საფანელში და ისე შევწვათ.



ფრიკადელკები ყველითა და სიმინდით

მასალა: 0,5 კგ. საქონლის რბილი ხორცი, 100გრ. დაკონსერვებული სიმინდი, 3-4 სუფრის კოვზი მარილიანი არაქისი, 1/3 ჩაის კოვზი მარილი, 3 სუფრის კოვზი ცხარე კეტჩუპი, 100გრ. მაგარი ყველი, მცენარეული ზეთი.
გასაფორმებლად: სალათის ფოთლები, კამა, წიწაკა ჩილი, პრასი.
მომზადება: გარეცხილი ხორცი გავატაროთ.  არაქისი დავაქუცმაცოთ როდინში ან ბლენდერში. სიმინდი გადავიტანოთ საწურზე.  ყველი დავჭრათ დაახლოებით 2x2სმ. ზომის ნაჭრებად.  ხორცის ფარშს დავამატოთ სიმინდი, არაქისი, მარილი და კეტჩუპი. კარგად ავურიოთ. მიღებული ფარშით გავაკეთოთ პატარა ბურთულები, თითოეულს გულში ჩავუდოთ თითო ნაჭერი ყველი და კარგად დავამრგვალოთ.  ფორმას წავუსვათ მცენარეული ზეთი, ჩავალაგოთ შიგ ფრიკადელკები, მათაც გადავუსვათ ზეთი. ფორმას გადავაფაროთ ფოლგა და შევდგათ შესაწვავად წინასწარ 200 გრადუსამდე გახურებულ ღუმელში 35-40 წუთით. მზა ფრიკადელკები დავალაგოთ სალათის ფოთლებით გაფორმებულ თეფშზე, ზემოდან მოვაყაროთ კამა, წიწაკები და რგოლებად დაჭრილი პრასი.

რჩევა: ფრიკადელკები ნაკლებად მშრალი იქნება თუ საქონლის ხორცს ღორის ხორცსაც შევურევთ. საცხობი ფორმის გარდა შეგვიძლია გამოვიყენოთ ფრიტიური.

შოკოლადის დესერტი ზეფირით

მასალა: 1 შეკვრა სხვადასხვა ფერის ზეფირი, 100გრ. კარაქი,  350გრ. შოკოლადი.
მომზადება: წყლის აბაზანაზე ერთად დავადნოთ შოკოლადი და კარაქი. მოვურიოთ კარგად, ერთგვაროვანი მასის მიღებამდე. გავაგრილოთ ოთახის ტემპერატურამდე (უფრო ცხელმა შოკოლადმა შეიძლება დაადნოს ზეფირი). ჩავყაროთ ზეფირი შოკოლადის მასაში, კარგად ავურიოთ ისე, რომ შოკოლადით მთლიანად დაიფაროს. მიღებული მასა გადავიტანოთ ფოლგაზე და მივცეთ ძეხვის ფორმა. ფოლგის ბოლოები გადავგრიხოთ მჭიდროდ ისე, რომ შიგნიდან არ გადმოიყაროს ზეფირი.  მოვათავსოთ მაცივარში მინიმუმ 4 საათით, უმჯობესია მთელი ღამით.  გამოვიღოთ მაცივრიდან უშუალოდ სუფრასთან მიტანამდე და დავჭრათ სასურველი სისქის ნაჭრებად.





ხილის სალათი ბროწეულითა და ყურძნით

მასალა: 1/2  ჭიქა ყურძნის მარცვალი, 1/2 ჭიქა პომიდორი ჩერი, 1/4 ჭიქა ბროწეულის მარცვალი, 1 მწიფე ხურმა.
მომზადება: ყურძენი უმჯობესია ავარჩიოთ მსხვილმარცვლიანი. მარცვლებს გავაცალოთ კანი და კურკები. თითოეული მარცვალი გავჭრათ  ოთხად. პომიდვრებიც დავჭრათ მეოთხედებად. ხურმას გავაცალოთ კანი, დავჭრათ კუბებად. ყველა ინგრედიენტი გადავიტანოთ ჯამში, ავურიოთ და მოვათავსოთ მაცივარში მინიმუმ ნახევარი საათით.

ხურმისა და ვაშლის სალათი

მასალა: 2ც. ხურმა, 1ც. ვაშლი (უმჯობესია ანტონოვკა),  1 თავი ხახვი, 1ს.კ. ლიმნის წვენი, 1ს.კ. ზეითუნის ზეთი, შაქარი გემოვნებით.
მომზადება: ხურმა და ვაშლი  დავჭრათ თხელ ნაჭრებად (კურკები ამოვაცალოთ ორივეს), ხახვი კი ნახევარწრეებად. ცალკე ჯამში ერთად ავთქვიფოთ ზეითუნის ზეთი, შაქარი და ლიმნის წვენი. დაჭრილი ხურმა, ხახვი და ვაშლი გადავიტანოთ სასალათეში და მოვასხათ ზეთისა და ლიმნისაგან მომზადებული საკმაზი. კარგად ავურიოთ.
Copyright © 2014 რეცეპტების კრებული გურმანებისთვის !